ರಾತ್ರಿ ಊಟಕ್ಕೆ ಸರಿಯಾದ ಸಮಯ ಯಾವುದು?

ಇಂದಿನ ಧಾವಂತದ ಬದುಕಿನಲ್ಲಿ ಕೆಲಸದ ಒತ್ತಡ ಅಥವಾ ಬದಲಾದ ಜೀವನಶೈಲಿಯಿಂದಾಗಿ ಅನೇಕರು ರಾತ್ರಿ 10 ಅಥವಾ 11 ಗಂಟೆಗೆ ಊಟ ಮಾಡುವ ಅಭ್ಯಾಸ ಇಟ್ಟುಕೊಂಡಿದ್ದಾರೆ. ಆದರೆ, "ಊಟ ಬಲ್ಲವನಿಗೆ ರೋಗವಿಲ್ಲ" ಎಂಬ ಗಾದೆ ಮಾತಿನಂತೆ, ನಾವು ಏನು ತಿನ್ನುತ್ತೇವೆ ಎಂಬಷ್ಟೇ ಮುಖ್ಯವಾದದ್ದು, ನಾವು ಯಾವ ಸಮಯದಲ್ಲಿ ತಿನ್ನುತ್ತೇವೆ ಎಂಬುದು. ಆಯುರ್ವೇದ ಮತ್ತು ಆಧುನಿಕ ವೈದ್ಯಕೀಯ ಶಾಸ್ತ್ರದ ಪ್ರಕಾರ ರಾತ್ರಿ ಬೇಗ ಊಟ ಮಾಡುವುದು ಆರೋಗ್ಯದ ದೃಷ್ಟಿಯಿಂದ ಅತ್ಯಂತ ಅವಶ್ಯಕ.

ರಾತ್ರಿ ಎಷ್ಟು ಗಂಟೆಗೆ ಊಟ ಮಾಡುವುದು ಉತ್ತಮ..?

ಆರೋಗ್ಯ ತಜ್ಞರ ಪ್ರಕಾರ, ರಾತ್ರಿ ಊಟವು ಸೂರ್ಯಾಸ್ತದ ನಂತರ ಅಂದರೆ ಸಂಜೆ 7:00 ರಿಂದ ರಾತ್ರಿ 8:00 ಗಂಟೆಯ ಊಟ ಮುಗಿಸುವುದು ಅತ್ಯಂತ ಸೂಕ್ತ. ನೀವು ಮಲಗುವ ಸಮಯ ಮತ್ತು ಊಟದ ಸಮಯದ ನಡುವೆ ಕನಿಷ್ಠ 2 ರಿಂದ 3 ಗಂಟೆಗಳ ಅಂತರ ಇರಲೇಬೇಕು. ಇದು ಆಹಾರವು ಸಮರ್ಪಕವಾಗಿ ಜೀರ್ಣವಾಗಲು ದೇಹಕ್ಕೆ ಬೇಕಾದ ಕಾಲಾವಕಾಶವನ್ನು ನೀಡುತ್ತದೆ.

ಬೇಗ ಊಟ ಮಾಡುವುದರಿಂದ ಸಿಗುವ ಅದ್ಭುತ ಲಾಭಗಳು:

1. ಉತ್ತಮ ಜೀರ್ಣಕ್ರಿಯೆ ಮತ್ತು ಗ್ಯಾಸ್ಟ್ರಿಕ್ ಮುಕ್ತಿ
ತಡರಾತ್ರಿ ಊಟ ಮಾಡಿ ತಕ್ಷಣ ಮಲಗುವುದರಿಂದ ಆಹಾರವು ಹೊಟ್ಟೆಯಲ್ಲಿ ಸರಿಯಾಗಿ ಜೀರ್ಣವಾಗದೆ ಆಮ್ಲೀಯತೆ (Acidity) ಮತ್ತು ಎದೆ ಉರಿ ಉಂಟಾಗುತ್ತದೆ. ಬೇಗ ಊಟ ಮಾಡುವುದರಿಂದ ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಒತ್ತಡ ಕಡಿಮೆಯಾಗುತ್ತದೆ ಮತ್ತು ಬೆಳಿಗ್ಗೆ ಎದ್ದಾಗ ಹೊಟ್ಟೆ ಹಗುರವಾಗಿರುವಂತೆ ಭಾಸವಾಗುತ್ತದೆ.

2. ತೂಕ ಇಳಿಕೆಗೆ ರಾಮಬಾಣ 
ನಮ್ಮ ದೇಹದ ಚಯಾಪಚಯ ಕ್ರಿಯೆ (Metabolism) ಹಗಲಿನಲ್ಲಿ ಚುರುಕಾಗಿರುತ್ತದೆ ಮತ್ತು ರಾತ್ರಿಯಾಗುತ್ತಿದ್ದಂತೆ ನಿಧಾನವಾಗುತ್ತದೆ. ತಡವಾಗಿ ತಿಂದ ಆಹಾರವು ಶಕ್ತಿಯಾಗಿ ಬಳಕೆಯಾಗುವ ಬದಲಿಗೆ ಕೊಬ್ಬಿನ ರೂಪದಲ್ಲಿ ಶೇಖರಣೆಯಾಗುತ್ತದೆ. ಬೇಗ ಊಟ ಮಾಡುವ ಅಭ್ಯಾಸವು ದೇಹದ ಹೆಚ್ಚುವರಿ ತೂಕ ಮತ್ತು ಹೊಟ್ಟೆಯ ಸುತ್ತಲಿನ ಬೊಜ್ಜನ್ನು ಕರಗಿಸಲು ಸಹಾಯ ಮಾಡುತ್ತದೆ.

3. ಗಾಢವಾದ ಮತ್ತು ನೆಮ್ಮದಿಯ ನಿದ್ರೆ : 
ಹೊಟ್ಟೆ ತುಂಬಾ ಆಹಾರ ತುಂಬಿಕೊಂಡು ಮಲಗಿದರೆ ದೇಹವು ನಿದ್ರಿಸುವ ಬದಲಿಗೆ ಆಹಾರ ಜೀರ್ಣ ಮಾಡುವ ಕೆಲಸದಲ್ಲಿ ಕಾರ್ಯನಿರತವಾಗಿರುತ್ತದೆ. ಇದರಿಂದ ನಿದ್ರೆಯಲ್ಲಿ ವ್ಯತ್ಯಯ ಉಂಟಾಗಬಹುದು. ಬೇಗ ಊಟ ಮುಗಿಸಿದರೆ ನಿದ್ರೆಯ ಗುಣಮಟ್ಟ ಸುಧಾರಿಸುತ್ತದೆ, ಇದರಿಂದ ಮಾರನೇ ದಿನ ಕೆಲಸ ಮಾಡಲು ಉತ್ಸಾಹ ಸಿಗುತ್ತದೆ.

4. ರಕ್ತದ ಸಕ್ಕರೆ ಮಟ್ಟದ ನಿಯಂತ್ರಣ
ರಾತ್ರಿ 8 ಗಂಟೆಯ ಒಳಗೆ ಊಟ ಮಾಡುವುದರಿಂದ ದೇಹದಲ್ಲಿ ಇನ್ಸುಲಿನ್ ಕಾರ್ಯಕ್ಷಮತೆ ಉತ್ತಮವಾಗಿರುತ್ತದೆ. ಇದು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು (Blood Sugar) ಸ್ಥಿರವಾಗಿಡಲು ಸಹಾಯ ಮಾಡುತ್ತದೆ, ಇದರಿಂದ ಮಧುಮೇಹ ಬರುವ ಅಪಾಯವನ್ನು ತಡೆಯಬಹುದು.

5. ಹೃದಯದ ಆರೋಗ್ಯಕ್ಕೆ ಹಿತಕಾರಿ
ತಡರಾತ್ರಿಯ ಆಹಾರ ಸೇವನೆಯು ರಕ್ತದೊತ್ತಡ (BP) ಮತ್ತು ಕೆಟ್ಟ ಕೊಲೆಸ್ಟ್ರಾಲ್ ಮಟ್ಟವನ್ನು ಹೆಚ್ಚಿಸುವ ಸಾಧ್ಯತೆ ಇರುತ್ತದೆ. ಸಮಯಕ್ಕೆ ಸರಿಯಾಗಿ ಊಟ ಮಾಡುವುದು ಹೃದಯದ ಮೇಲಿನ ಹೊರೆ ತಗ್ಗಿಸಿ, ಹೃದಯಾಘಾತದಂತಹ ಅಪಾಯಗಳನ್ನು ದೂರವಿಡುತ್ತದೆ.

ಸಲಹೆಗಳು:

 ಲಘು ಆಹಾರ:  ರಾತ್ರಿಯ ಊಟವು ಹಗಲಿನ ಊಟಕ್ಕಿಂತ ಸ್ವಲ್ಪ ಹಗುರವಾಗಿರಲಿ.

 ವಜ್ರಾಸನ ಅಥವಾ ನಡಿಗೆ: ಊಟದ ನಂತರ 10 ನಿಮಿಷಗಳ ಕಾಲ ವಜ್ರಾಸನದಲ್ಲಿ ಕುಳಿತುಕೊಳ್ಳುವುದು ಅಥವಾ ನೂರು ಹೆಜ್ಜೆ ನಡೆಯುವುದು ಜೀರ್ಣಕ್ರಿಯೆಗೆ ಪೂರಕ.

 ಕೆಫೀನ್ ತಪ್ಪಿಸಿ: ಮಲಗುವ ಮುನ್ನ ಟೀ ಅಥವಾ ಕಾಫಿ ಕುಡಿಯುವುದನ್ನು ತಪ್ಪಿಸಿ.

"ಆರೋಗ್ಯವೇ ಭಾಗ್ಯ" ಎಂಬ ಮಾತಿನಂತೆ, ಒಂದು ಸಣ್ಣ ಬದಲಾವಣೆ ನಿಮ್ಮ ಜೀವನದಲ್ಲಿ ದೊಡ್ಡ ಕ್ರಾಂತಿ ಮಾಡಬಲ್ಲದು. ಇಂದೇ ನಿಮ್ಮ ರಾತ್ರಿಯ ಊಟದ ಸಮಯವನ್ನು ಸರಿಪಡಿಸಿಕೊಳ್ಳಿ ಮತ್ತು ಆರೋಗ್ಯವಂತ ಜೀವನದತ್ತ ಹೆಜ್ಜೆ ಇಡಿ.